“Heben” by bhonj

Rusngiit nga uray la gumigis
Arutittit nga sumaplit arigem palsiit
Ngem no talyawem iti aglawlawmo ikit
Awan sabali no di ni Johnny, inka masirit.

Kabayatan iti nagkaado a sagubanitna
Agsusukot, agtutupatop, agsasanga
Maalananto payla’t aggarakgak, agkatawa
Uray na la itangad-tangad, natnag gayam pustiso na.

Arak ti maysa nga inna pangliwliwa
Pammigat, pangngaldaw,pangrabii isu’t danumna
No kastigarem, pampaimas pangan kunaen na kenka
“Ket di mo paylang ilabay”, inka isungbat, ay sultakennaka.

Intunno makaadon, isaganam da bagin
Di mapugsatan ti sao, karyarenna amin
Dayta ni Johnny, katatao na’t managbabain
Ngem no makainom, Diyos ko, mangibabain.

Kiwar ditoy, pinggit dita, dayta’t inna iyul-ulo
Nalaing nga umanunsyo, uray pinagbulan ti baket a kubbo
Ipustananto pay amin a di mangan-ano
Ngem no naatap ni gasat, agtinnagton a tuyo tay adobo.

Awan la’t di awan, tila adda paylang inda masangsango
Siam ti nagsasaruno, adda pay ubba nga agsussuso
Di payen mapunas a buteg, agkaraiwara nga isbo
Ngem no simmangbay da rabiin, dayta manen Apo, otso-otso.

Kastoy ti kasasaad iti kaaduan a Pilipino
Nakakatkatawa a kunaem ngem isu’t pudno
Narway unay inda panagsarak ti rag-o
Sadanto laeng mautob iti nasayaat,
dimmagadanton ken dimmapo.

ARIEL “Bhonj_” AGNGARAYNGAY, is a native of Solsona, Ilocos Norte and a third-year Civil Engineering Student in MMSU.

Ayanmo, Paskua? –by Mickle Cris Peralta

Ayanmo, Paskua? –by Mickle Cris Peralta
Ayandan dagiti tagtagari
Rimrimat ti silaw a di mapundi
Aglalo no matungpal dagiti karkari
A mangted ragsak kadagiti umili

Ayandan dagiti agkerkerol
A maragsakan ken makaayat uray laeng no binting
Iti bulsada ket agkiling-kiling
Urnungenda nga pagay-ayam ti tatsing

Agawid ngata ni tata wenno ni nana ita a paskua?
Tapnon maarakupdakami a pamilyana
Umayda iparikna ti nagpaiduma a dungngoda
Uray nakagalutda iti ubra sadiay adayo a daga

Adtoyen ti panagkasangay
Tay naibaon nga umay mangtarabay
O pada a tattao, ikurimedtay pay lang ni liday
Umaykan paskua, ay, umaykan ala

Sagidem daytoy puso a maul-ulila.

Paskua Manen–by Marceos Ibasan

Ti rabii ket atiddogen
Pul-oy ti angin nalamiisen
Narimat dagiti naraniag a bituen
Sinyales dagitoy, paskua manen!..

Marnekka a maturog
Wen ta appayaunayen ti busbussog
Ngem no agriingka iti bigat
Gapu’t lamiis, agkursing ti lalat

Disyembre ket diak pulos isukat
a bulan daytoy a napnuan gasat,
Ngamin ni Apo Jesus ket nayanak
Isu a rumbeng nga inta’y agrambak..

Ngarud, panawen ti panagkaykaysa,
Panag-iinnayat, pinagkakadua,..
Lipatentayon iti gurang-gura,
Ngamin daytoy ti pudno a paskua..